“AYAN NA SI CRUSH!!”

By:Teacher Liz Querido

Manager: Teacher Mark Bryan Eñeja

Critic: Teacher Jenalyn Bicera

Pagmulat ko sa umaga

Ako’y napabangong bigla

Naku! Anong oras na!

Sa klase baka ‘di na makaabot pa

Lahat ginawa nang may pagmamadali

Pagligo, pagsepilyo at pati na pag-ihi

Ngunit sa pagpapaganda ay aking pinagbuti

Sa pagpasok ay may baong ngiti

Nang ako ay nasa amin nang paaralan

Ang mabilis na lakad ay naging marahan

Ako’y biglang namula sa aking napagmasdan

Si Crush! Ayan na naman!

Ika’y aking nililingon pakunwari

Pag napatingin naman saki’y biglang bawi

Nakakakilig!! Ako tuloy ay napatili!

At lahat ng nakakita sa aki’y napangiwi

Nang maramdamang ika’y papalapit

Naging mabilis ang aking pagmulat-pagpikit

Isa ba itong napakagandang panaginip?

Tuloy, napalunok ako nang paulit-ulit

Ang nakapusod na buhok ay aking inilugay na

Kasabay ng pagwagayway nito nang bonggang-bongga!

Mga tuhod ko’y nanginginig nang sobra

Ang ngiti sakanya’y abot hanggang tenga

Ako ay halos himatayin

Nang siya ay ngumiti din sa akin

Siya kaya saki’y meron ding pagtingin

At ako’y kanya ng napansin?

Nang siya ay kumaway sa akin

Ako’y napabuntong-hininga’t kumaway din

Nang siya ay kumindat sa akin

Kilig na nadarama’y kay hirap pigilin

At ayan na nga si crush! Napakalapit na!

Hinamig ko ang sarili’t bumati ng magandang umaga

Ako’y napayuko at napahagikhik pa

Sa pagtaas ng ulo, ako’y nabangga niya nang bahagya

Napawi ang aliwalas ng mukha nang ako’y lampasan

At ako’y pairap na lumingon sa aking likuran

Si Crush! Isang magandang babae ang nilapitan

Langya naman oh! Nakakahiya naman!